Ribeira avanza no obxectivo de unir toda a súa franxa costeira nun único espazo accesible para peóns, unha senda verde para gozar plenamente da súa natureza, mar e historia. Dende Punta Couso atoparemos unha pasarela de madeira e camiños de terra ben marcados ao longo dunha costa escarpada con vistas ás Illas de Sálvora, Vionta e Noro, ata chegar ao Porto de Aguiño, no que poderemos contemplar as descargas dun dos mariscos máis prezados do lugar, o percebe. Desde este punto poderemos seguir camiñando polo paseo litoral Carreiro-Areeiros-Catía ao carón das praias da Tasca, O Castro e A Catía ata chegar a Castiñeiras. En ruta cara o interior da ría e tras un tramo por estrada, poderemos seguir polo paseo marítimo Touro-Ameixida e continuar cara o núcleo urbano de Ribeira. Se optamos por estender a nosa ruta, podemos facelo polo paseo de Coroso ata a praia de Río Azor. Cunha pequena camiñada de 20 minutos chegaremos á vila mariñeira de Palmeira.