Dende a praia da Torre, na que remata o paseo marítimo de Rianxo, podemos continuar camiñando pola senda litoral de Taragoña ao longo de 4 km máis, ata o lugar da Burata bordeando o litoral da enseada de Rianxo e achegándose ata as marismas da desembocadura do río Beluso, fronteira co concello de Boiro.
A senda discorre por unha paraxe verde e tranquila, boa parte cruzando bosques autóctonos con carballos, loureiros ou castiñeiros, entre outros, e tamén campos de cultivo ou pequenos regatos protexidos por freixos, ameneiros e salgueiros. Durante o percorrido podemos ter a sorte de ver, cando a marea está baixa, a mariscador@s cos seus raños recollendo exquisitos manxares como ameixas ou berberechos. Ademais, esta zona é boa tamén para a observación de aves, principalmente no inverno, como o mergullón de pescozo negro e o mergo cristado. No porto de Taragoña e na enseada de Ponte Beluso poderemos observar ademais parrulos, garzas reais, garzotas, gaivotas e picapeixes.