Son tres afloramentos rochosos cheos de gravados que conforman posiblemente o conxunto de maior interese do rico complexo rupestre do concello de Rianxo. Nas súas máis de sesenta representacións abundan os motivos animais e antropomorfos. Mostra un cervo cunha liña a modo de colar, un feito bastante estraño, unha posible escena de equitación e outra de aparente contido sexual. Trátase dunha extraordinaria recompilación dalgúns dos máis habituais motivos dos petróglifos galegos. O acceso ata o lugar resulta sinxelo.