O Castro do Achadizo remonta a vida deste enclave mariñeiro ata a Idade de Ferro, sempre vinculada estreitamente ao mar. Hoxe esa conexión coa ría amosa tal dependencia que resulta obvio o seu carácter umbilical. Practicamente nada pasa en Cabo de Cruz sen a implicación directa das augas da ría. A vila vive da acuicultura do mexillón, do marisqueo, da conserva ou do sector transformador dos produtos do mar. O porto pesqueiro e a lonxa concentran unha vitalidade extraordinaria. Consérvase o vello peirao, un dos máis antigos da comarca. O club de remo compite nas grandes ligas de traíñas. E conta cun impoñente porto deportivo.