Considerado o espazo verde do centro boirense, este parque ‘elevado’ é un remanso de natureza e tranquilidade. Unhas 40 especies de árbores autóctonas galegas entre as que destacan piñeiros, teixos ou camelias, conforman un fermoso bosque para o deleite de visitantes, que atoparán tamén aquí a Casa da Cultura, a fonte do Arco da Vella e outros recursos etnográficos, ademais dun parque infantil. Durante as festas de Boiro, a primeira semana de xullo, reúnense aquí as ‘peñas’ nunha intensa xornada de xogos e competicións. O lugar é tamén habitual para a celebración de festas, concertos e romarías.