O río Pedras esculpiu neste lugar varias pozas ou piscinas naturais, con saltos de auga e pequenas fervenzas, case como un parque acuático no que podemos gozar dun baño ben refrescante tirándonos por tobogáns de pedra ou mergullándonos nas charcas dende as rochas. Un oasis de natureza moi divertido.
Ao longo do percorrido para chegar a este pequeno paraíso atópanse distintos vestixios que farán a nosa visita máis interesante: antigos muíños de pedra, unha ponte medieval ou os restos do Convento de San Xoán de Lesón (A Miserela). O lugar ata conta cunha lenda propia sobre San Amaro, unha barca de pedra e os mouros que non conseguiron capturalo porque o río enchíase de cantos rodados que lles impedían o paso.