Praias de Rianxo

Rianxo é o municipio de Barbanza-Arousa situado na cara máis ao interior da ría e polo tanto, o que ten as praias máis protexidas. As súas augas adoitan ser un remanso de paz e perfectas para o baño.

Praia das Cunchas

A praia das Cunchas é un areal tranquilo nun precioso contorno fluvial, preto da desembocadura do río Ulla. Este é un lugar perfecto para pasar o día en familia, con aparcadoiro, piñeiral e posto de comidas. Ao seu carón atópase a praia do Porrón e moi preto hai un castro e os petróglifos dos Mouchos.

• Lonxitude (metros): 130 metros
• Tipo: Praia resgardada
• Tipo de area: Gorda

Praia da Torre

Esta é a praia máis longa de Rianxo, na desembocadura do río Té, en Taragoña. Ata ela chega o paseo marítimo da localidade e dispón dunha ampla zona de recreo. Moi preto do areal, cruzando unha ponte sobre o río, atópanse as ruínas do Castelo da Lúa e o porto do Pazo. 

• Lonxitude (metros): 930 metros
• Tipo: Praia resgardada
• Ondada: Feble
• Tipo de area: Fina
• Ocupación temporada estival: Alta
• Servizos: Chiringuito, aparcadoiro, zona de merendar.

Praia do Porrón

400 metros de area fina para gozar dunha xornada familiar. A praia do Porrón é perfecta para acudir con nen@s polas súas augas tranquilas e situación resgardada. A punta do Castro, no que se atopa un antigo asentamento castrexo, separa esta praia da das Cunchas.

• Lonxitude (metros): 400 metros
• Tipo: Praia resgardada
• Ondada: Feble
• Tipo de area: Fina
• Ocupación temporada estival: Alta

Praia de Tanxil

Esta é a principal praia do concello de Rianxo en canto a número de visitantes, servizos e pola súa proximidade ao casco urbano. De augas tranquilas e area gorda, no seu contorno atópase o Pazo de Baltar ao que pertenceu o seu dique.

• Lonxitude (metros): 220 metros
• Tipo: Praia resgardada
• Tipo de area: Grosa
• Ocupación temporada estival: Alta
• Servizos: Parque, servizo de salvamento, duchas, aseos, aparcadoiro, restaurantes, teléfono, acceso persoas con diversidade funcional