¡Hola! Utilizamos cookies propias y de terceros para analizar el uso de esta web y mejorar tu experiencia de navegación. Al continuar navegando entendemos que aceptas nuestra política de cookies.    Saber máis - Aceptar.
Secciones
Síguenos en las redes
Buscar
Idiomas disponibles

Rede Comarcal de Sendeiros

 

A Mancomunidade de Municipios Barbanza Arousa crea a Rede Comarcal de Sendeiros. Catro rutas acondicionadas e homologadas pola Federación Galega de Montañismo. Perfectamente señalizadas e aptas para tódolos públicos.

Senda Fluvial do Río Artes

PR-G 265

A ruta iníciase na ponte sobre o río de Artes, na súa área recreativa con elementos deportivos, mesas e bancos para o descanso e espazo de aparcamento. Deste punto parte a ruta que atravesa o río por unha pontella e prosegue pola banda esquerda descobrindo o seu bosque de ribeira e neste punto a fonte e o gran lavadoiro rehabilitado de Artes, que aproveitaba as cristalinas augas para que as mulleres lavaran esforzadamente a roupa das súas casas. Segue a ruta pola ribeira do río de Artes, por camiños, pasarelas de madeira e sendeiros de terra e unha pequena pista asfaltada ata chegar ao o muíño de regato chamado Muíño de Correa. Pouco máis adiante unha derivación se desvía da ribeira e nos achega a un dos tesouros desta ruta, un dos máis importantes monumentos megalíticos de Galicia: o dolmen de Axeitos. Volvendo á ruta polo mesmo camiño, seguimos camiñando pola beira acompañandos pola sombra do bosque de ribeira, que aínda se conserva en boa parte do percorrido. Pásase ao carón de varios muíños e do lavadoiro rehabilitado de Portochouzo, que ten unha pequena área recreativa onde poderemos descansar. Continúa por lugares que aínda manteñen un bosque de ribeira ben conservado e con presenza de árbores como a sobreira, e restos de elementos etnográficos como presas tradicionais para os muíños, pasais tradicionais no río, pontellas de pedra... Logo se converte nun carreiro de pescadores, con grandes penedos e tras achegarse a outro muíño tradicional remata no lugar das Lobeiras de Arriba.

 

Subida á Curota polo Río Pedras

PR-G 263

A ruta iníciase no aparcadoiro de Aldea Vella, subindo pola pista que sae a man esquerda do aparcadoiro, camiñando pola marxe dereita do río das Pedras. O camiño avanza por unha pista entre plantacións forestais de eucaliptos e piñeiros, pero pronto perde anchura converténdose en camiño e continúa ata alcanzar a ponte de orixe medieval de San Xoán da Misarela, que salva o leito do río que desde aquí ao seu nacemento se coñece tamén como o río San Xoán. Preto da ponte encóntranse os restos do antigo convento da Misarela. Neste punto cruzando a ponte, a ruta leva o seu trazado pola ribeira esquerda do río remontando o seu leito, por un carreiro que pasa primeiro a carón dos restos do convento e logo, a carón dos saltos que conforman as fervenzas do río das Pedras e as do río de San Xoán (ou da Misarela). Unha vez que chegamos ao punto máis alto deste carreiro, nas proximidades do Alto do Armelo, vadéase o río San Xoán grazas a uns pasos sobre as pedras do río, para continuar pola outra beira en dirección sur ata as proximidades do aparcadoiro do miradoiro da Curota, onde comeza a derivación que leva ao miradoiro da Curota (512 m), desde onde se pode gozar dunhas espectaculares vistas sobre a ría da Arousa. O camiño continúa descendendo a través dun carreiro ata o miradoiro de Valle Inclán onde se encontra unha escultura do ilustre escritor, cun grande arraigamento na Pobra do Caramiñal. Desde o miradoiro podemos baixar ata Aldea Vella entre plantacións forestais pola variante deste PR-G.

 

Roteiro do Río Té

PR-G 261

Esta pequena ruta achéganos a distintos puntos de interese ambiental e patrimonial do concello de Rianxo. A través dela poderemos descubrir a natureza do río Té e como ao longo da historia a humanidade foi ocupando este espazo rico en recursos naturais (agricultura, pesca, gandaría, bosque...). O río Té nace preto do monte da Muralla, duns 500 m de altitude, e logo de percorrer arredor de 12 quilómetros desemboca no lugar do Pazo na ría de Arousa Numerosos lugares de interese desta ruta descóbrennos a riqueza natural, cultural e paisaxística do río Té. No comezo recíbenos unha fonte, protexida polo bosque de ribeira, formado por árbores como o ameneiro e o freixo, que coidan e conservan o ecosistema do río. Ao longo do percorrido poderemos ver varios muíños de regato, utilizados no pasado para moer o cereal. O de Francuín, un dos máis grandes, era un muíño de maquía. O ambiente húmido e de escasa luz favorece a abundancia do dentabrún ou fieito real, acompañado por unha diversa e valiosa fauna: o merlo rieiro, a ra verde, o lagarto das silvas, o reo ou a lontra rebolen con minúsculos invertebrados como as pitas cegas ou os cabaliños do demo. No paseo teremos que atravesar varias pontes e pontellas desde onde poderemos apreciar e refIexionar sobre os imprescindibles recursos que nos ofrece o río: auga para beber, regar, pescar, bañarnos, forza para os muíños… e do necesario uso responsable evitando a súa contaminación.

 

 

Roteiro do Castelo de Vitres

PR-G 264

Ao longo deste itinerario encontrámonos con interesantes mostras de patrimonio etnográfico, como os pasais de Brazos que nos ser- virán para cruzar o río Coroño, o cruceiro de Galegos, os muíños do río Acevedro ou as interesantes mostras de construcións po- pulares na aldea de Mosquete: o lavadoiro, os hórreos, as antigas casas con eiras... Discorre por unha zona rural onde diversos usos agrícolas e gandeiros tradicionais aínda perviven: campos de millo e avea altérnanse coas vides de uvas albariña, caíña, loureira, treixadura, brancellao, espadeira, mencía ou sousón que se empregan para a produción de viño “Terras do Barbanza e Iria”; e a subida á serra é o lugar por onde pastorean as cabras das aldeas do pé de monte e as vacas mostrencas. Os ríos Coroño, Cachopo e Acevedro, aínda acollen boas mostras da vexetación de ribeira onde encon- tran acubillo multitude de animais; ou algunhas mostras do bosque autóctono onde domina o carballo cer- queiro acompañado de castiñeiros e algún corticeiro. Este itinerario remata de forma espectacular coa subida pola antiga e impresionante calzada do Sino que desde Mosquete que pouco a pouco, nalgún tramo zigzageando e noutros excavado sobre a propia pedra, nos vai subindo até o Castelo de Vitres, un antigo asentamento desde onde se vixiaban as nosas costas fronte os ataques que sufrían ao longo da Idade Media, e desde onde podemos gozar dunha espectacular vista sobre a Ría de Arousa.